Litteraturhuset: Bjørn Hatterud - Far levde, og så var han død
Om arrangementet
"Du ska skrive om meg. Og du ska skrive om æill driten å!!"
I september kjem Bjørn Hatteruds nyaste bok. Han har skreve bok om far sin. Det er "ei bok om traktormekanikk, trekkspelmusikk, heimbrenning og umåla furu".
Landbruksmekanikaren Tor Hatterud kom frå generasjonar av praktiske menn, gard- og skogbrukarar og husmenn i Veldre i Ringsaker. Han skrudde alltid, hadde hender fulle av sår og merke, gjekk milevis på ski, snakka gamalmodig veldredialekt og viste kjærleik gjennom å vaske bil. Sonen Bjørn er alt anna enn nevenyttig. Han er ein homofil og funksjonshemma akademikar som jobbar i kulturfeltet i hovudstaden.
Kven var far til Bjørn? Og kva skjedde då faren døydde? Tor mista først kontroll over venstre foten. For første gong gjekk faren like sakte som den haltande sonen, og ein annleis samtale mellom far og son starta.
Noko av det siste Tor gjorde, var eit stort byggeprosjekt. Han glasa inn verandaen, laga eit lyst og luftig rom for sol og glede.
Dette er ei forteljing om ein far som var ein heilt vanleg mann, og om liv og død.
Litteraturhuset i Trondheim har invitert Bjørn Hatterud til samtale om den nye boka med forfattar Erlend Skjetne.
Bjørn Hatterud (1977) er forfattar, kurator, kritikar og skribent, som lagar støymusikk på si. Han er skeiv, funksjonshemma og klassereisande, og er særleg oppteken av motsetningspar som høg- og lågkultur, innanfor- og utanforskap, avvik og normalitet. Hatterud jobbar tverrfagleg i skjeringspunktet mellom kulturhistorie og kunst. Hatterud har eit solid forfattarskap bak seg og har hausta fleire prisar, medrekna Kritikerprisen, Bibliotekets litteraturpris og Fritt Ords pris.
Erlend Skjetne (1988) kjem frå Melhus og skriv bøker for både vaksne og ungdom. Han har hausta fleire prisar og nominasjonar for sitt forfattarskap; han har vore nominert til Tarjei Vesaas’ debutantpris og Kritikerprisen, og han har vorte tildelt NTNUs litteraturpris, Bokhandelens forfattarstipend og Brageprisen.
Sted: Kulturtorget, Trondheim Folkebibliotek
Fotokredit: Agnete Brun/Samlaget
